फैसालि नुहरै रिउ रिउ गोजानाव
गंसे फिरफिला बिरहोनो
जावबाय दिङाखौ जिउ होनानै
रिनदाव-रिनसि देँखो हगारना सुफिनाव
.
दावहा आरो दावहा जेब्लाबो
थांनानै थानो आरो थांनो जुजिनानै
आयनि समाय आफानि सिमां
जिउ गोरबोनि बिखायाव लानानै
.
अरन सिँखावनाय दैमा खेँखायनाय
गुथालजोँ जुजि फाखनजोँ जुजि
बैथाखौ गोरायै हमदोँ आं
गावनि गोथार आखाय मोजोमाव
.
लैथोमानि लोगो दिङानि बामखआव
आंनि मोखांजोँ खनले खनले
खोमसि हर फैयो आरो थाङो
सोरांआ थाङो आरो फैफिनो
.
रुगुं मानखोनो आंनिनो मिजिँ
बेयावनो आंनि दाहानि गाबनाय
माब्लाबा आंनिनो गोदै रंजानाय
बैसागु थाङो बैसागुआ फैयो जेरै
.
लैथोमानि लोगो दिङानि
गाथोन गारबोनाय बै गाथोननिफ्राय
आंनि दावबायनाया आवगायबाय
लैथोमानि फैलाव बिखायाव
This poem has not been translated into any other language yet.
I would like to translate this poem