आंखाल गैया सानबोलावरिनि Poem by Ronjoy Brahma

सानबोलावरिहा मा आंखाल दंदि-
जोँ गासै हास्थायनायखौनो मोन्नो हाया?
सानबोलावरिया जेन मोनसे हायनामुलिसो
अनजालिखौ खावनानै जुलि खालामनाङा बे रायजोआव।
मोखथांनि आसोल बदनामखौ सिखोमानो
नेहाथ सुबुंआ सावथुनाव एक्टरनि फाव खालामनाय!
थिल'थमा! नोँनि महरा जेसेबां जिरख'नाय
सानबोलावरि सिख्लाया नोँनिफ्राइ गोसोथोथावसिन।
रेलगारिया खेबसेबो फावसाया- खारलांबायल' थायो
आयआसो जेन अमा खासिखौ दोँदोँ बोलांदोँ,
खन्थाइगिरिनि गोरबोआ एब्रेलाङो गोथौनिफ्राइ गोथौसिन दैखर
सानबोलावरि गुवार मुलुगनि बरनायख'हायै हादाबाव।
सोमजिखाङो रोखोमारि गाब उथ्रिसारनायनि सानहाब
गावनि गोरबोखौ गावनो गाग्लोबनांगौ जायो,
आं लैथोमानि निजिरा सिङाव लोहाबनाय थरसे अन्थाइ
साननि सोरां सोबखना जिउगोलाव जागोन।
गलाब बिबारा बारनो सिमान जायाब्लाबो
बारहोनो हायो खन्थाइनि गुरै आखाय,
लाजिगुसु दोरबि सिख्लानि गेबेँ मोखांजोँ
लाजिफोनांनो हागौ अखाफोरनि रैरुबु महर