दिनैनि जारिमिन Poem by Ronjoy Brahma

आं उदिस मोनस्लाब थाराखै
सानस'नोबो मोनस्लाब बायाखै
जे जे अखा हादोँब्लाबो
सोरांस्लाब मोनै जेउ जेउ गलिनिफ्राय
आफाया मोसौ बर'नदोँ,
हेब्रे-माब्रे लेवारनि नबथियाव
लेवारफ्रा सिरि मोनस्लाबै
आफाया मोसौ बोलांदोँ
लेवारफ्रा हरखाब सिरि मोन्ना
बेसाराफोरा थेनथौ फिनलायदोँ
उन्दुबावगौ उन्दुबावगौ-
नाथाय सोरबा सोरबा लामायाव
गोदोना फोलाव फोलाव
आफाखौ जमना थादोँ
फै बेटट्आ फै....।
दिनै आमथिसुवा, जालु सान
थाइजौ, खान्थाल, रैमालि
लटरख' बायदि फिथाइ जानाय
मिथिँगानि बिदै लोबनाय सान
फुंआव मोसौखौ खाना फैबाय आफाया
आंनि बाहागोखौबो आं सानेरनायसिमाव
बोलांबावबाय....।
आं गल' नायहरबाय
जेब्ला आं खोरखि नाब्लांना नुयो।
आं सान्दोँ दिनैथ' मोजां सान
आं हमनो हाखादोँ बेखायनो
उननि फालाया आंनि
(दै दौनाय, गलियाव खाफैनाय) ।
आं हमनो हाखादोँ
मानोना दासान्दि हब हब मोनामदोँ
सौखि सिङाव एमावनि रोसि
मायब्रा जुमायनि बिदै।
मोखां गन्थं सुना
खबसे ओँखाम फानलु बाथोनजोँ।
आफाया गोदोना सेरबाय
र' र' बिदै ओँखारबोबाय
गोथाव गोदै मल मल
आफाया ग्रद ग्रद हां खुनसेनो।
आरोबाव गिदिँ गिदिँ गामि गंसे
खुरैफा खुरैफा बेनाव बैनाव
गोखै, गोदै; गांजेमा, ना बाथोन
मोनाब्लासो आफाया फैबाय
खुदै फेद फेद मोनामब्रुं....
लोरलां-लोरथां, खांग्रांहां-खुग्लुबहां
हब्रा हब्रा दसेनो आलायारन
दसेनो सिमां सिमां,
दसेनो बैसागु, दसेनो अजानि जारिनाय
टेरेनाम, दिल मंगे मर
होख्राव होख्राव सोर।
गदा-गदि हाब्रु
बावैसो दाउसा जुब्राया एरायलांनाय
दाउ बिमानि दाउखियाव
आफाया दामफ्ले, बेयावनो गांलाब
हंख्रुदगु लायबाय आद्रि आद्रि।
खाथियाव सैमा खालुआसो नेना थाबाय
मोनागु लायबाय बेयावनो
गलि बुंजाफा मोसौखौ खाना
सिला गाग्रोमोना दिउ दिउ रागा
थेला नारनोसो गोसो जाबाय आं
एसेयावनो आयआबो फैबाय
बाजोल' बागुरुम्बा मोसा मोसा।
बर'फोरनि बोथोरा बारजोँ फैयो
बिसोरनि रंजानाया जायो हाब्रुआव
दाबो असुरबादि नङो
बिसोर जानाय लोँनायफोरा
अमा दुगैनायबादिसो रंजानाय
सि: सि: लामा सामा गोग्लैसोनाय
हाखर-हाला मेमब्रायनाय।
जौआ बाखोनायनो फोरोँङा
दुसिनोसो फोरोँङो
जौआ जौगानो फोरोँङा
बेयो हमथा थारनोसो बोलो होयो
गावनि सिं खालामना
हाब्रुआव नारसोमो।
जौआ माननि सोदोबखौ
मैला खालामना
बदनामनि मुंखौ गोजोँसो खालामो।
जौ हाबाब आयौ जौ
सोर बुंनो हागौ-
सिजौनि बिजौ?
बियो माथो सिजौनि सिंजौसो।