स्रिमत गुरुदेब कालिचरण ब्रह्म Poem by Ronjoy Brahma

हनै बेसेबा दुखु नांथाव
सोरबा सरनीया सोरबा खृष्टान
गावनि घोरोम गारै गारै
खोमसियै मुसलिम जानो हमथारबायमोन।
सेरखाय बेरखाय
ना मावा रोनावनाय
दै गुसु नागिरनो हमथारदोँमोन।
गुबुनजोँ अना साना
सै सै मुगैजानो हमदोँमोन
खालामदोँमोन लै लै इनायै।
बर'नि अख्रांआव अलंबार
गोदान गोहोजोँ उजियो
जायखौ बुङो गुरुदेब 'बाबा'
स्रिमत कालिचरण ब्रह्म।
दै खुरखानाय बायदि हाब्रां
गुगालांबायमोन बर'आ साफा साफा,
खैफोदनि समाव माबा मोनसे लामा-
'सारनित्य क्रिया' बेनो राहा
गुरुदेबा सैथोनि मेगन साथियो
ब्रह्म घोरोमनि लामा नागिरो...
आन्दायनाय बर'आ सोरां मोनो
ब्रह्म घोरोमनि लामा गेवो...
ब्रह्म घोरोमानो हमथाग्रा जायो बर' हारिनि।
बोखांफिनबाय गुरुदेब नोँ
गोमालांनो हमनाय दुलाराइ बर'खौ,
गोदान लामा,
सोरां लामा,
गोदान राहा,
गोदान मिजिँक,
अनसायबाय गुरु नोँ आफाया।
हे गुरुदेब!
नोँखौल' गोसोखाङो दिनै
गोदान जारिमिन
बर'नि गासैबोमानि।
नोँनि सानस्रि
नोँनि घोरोम
नोँनि गोख्रोँ मेलेम
सांग्रां आरो गोथौ नोँदि गोथार।
बावनो लानाय नङा गुरुदेब
जोँ अनसायगोन नोँखौ
जोँ अरायबो गेदेमा मान होगोन।
आय' आफा नोँनि दिन्थिखौ
जोँ अरायबो बावनो हानाय नङा।
बर' थुनलाइ सोरजिनो थुलुंगा,
सोलोँथाइ,
रांखान्थि,
राजखान्थि,
समाजखान्थि आरो
जेबो जेबो आफा
नोँनिनो गासैबो बिहोमा।