दुखुनि मोदै हुगारनानै Poem by Ronjoy Brahma

दुखुनि मोदै हुगारनानै

सुखु-दुखुनि
जोनोमथिलि बिमा आय,
अनफावरि, रैखागिरि, निमाहागिरि
गोथारै गोजोन दैदिँगिरि बिमा।
आंनि गेलेनाया नोँनि बिखायाव
आंनि गासैबो रंजानाय-गाबनाय
सुखु-दुखु नोँनि मोखांआव।
नोँनो दैथिँङो मिथिगौ आयै
अब्लाबो नोँखौ दुखु होयो,
नोङो अनफावरि आयै
थेवबो नोँनि फिसाफ्रा अख्रा;
नोँनि आलो आलो बिखायाव
रंजायै-मिनियै
मानबायै-थाबायै
आंबो देरबोनाय,
नोँनि अनफावरि बिखायाव उफ्लेबोनाय,
देर- दोखोन देरनानैबो
आथुमसे गोहो थानानैबो
आंहा बोलो गैयै बादि आयै
आंहा गियान गैयै थेवबो;
नोँ मिथिगौ आयै गासैखौबो
बिनिखायनो गाबो नोँ मोदै फसर फसर!
दिनै नोँनि मोदै हुगारनाय
नोँनि दुखु हुस्रांनाय
गासैबो आंनि
बिबाना गासैबो आंनि;
हनै आयै-
आंबो नुदोँ,
हारि हादरा सोरनि जादोँ?
अनलायनाय गैया गावनि सिलायाव
बिदा-फंबाय गावजोँ गाव
गोजोनै थानो बिसोरो नागारदोँ,
गोरबोआव फारागखौ खालामदोँ
सोमोन्दो बोस' लायदोँ,
सुथुर सुथुर सुथुर
मैला बाफबनाय खुगायाव लादोँ,
बिनिखायनो गाबदोँ आयै
आं हमदां हादोँ आयै!
नोँनि गायखेर जानाय
नोँनि थैजोँ देरनाय
नोँनि गुसु बार बिलिर बिलिर
गेलेयै-रंजायै फोरोँनाय
हमदां मोन्दोँ गोरबो आंनि।
आंनि आंगोनि थैजोँ गुबुन नङै
हादोर-हादोर बारजोँ सोलोँनाय
गावनि गावखौ सिनाय रोङै
गावनि सोर, गाव सोर?
नोँ आंनो गियानखौ हो आयै
गोथार बारखौ बिलिरहर
स्राय स्राय मोसायै
रंजायै-रंजायै रंजानानै
जुजियै जुजियै सुथुरजोँ
आं हुगारनि नोँनि मोदैखौ।
नै आयै-
जुजियै जुजियै सुथुरजोँ
लोरबां देहायै मेँग्लिब्ला
गोबालांगोन आं आय अनफावरि
बैसोमातानि बिखायाव,
मिनिस्लु मिनिनाय गोसोजोँ
आयै आं नोँनि-
दुखुनि मोदै हुगारनानै।

Sunday, December 21, 2014
Topic(s) of this poem: Mother
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success