बिखा गावदोँ आंहा, बिखा Poem by Ronjoy Brahma

बिखा गावदोँ आंहा, बिखा

Rating: 5.0

आं आंनि खोमाजोँनो खोनायो
गावनि मेगनजोँनो नुयो आं
रजे बेफोर रमान्सनि दोरोद्नाय राव
बेफोर गासैखौबो मिथिगौ आं
आरो मिथिगौ- -
गोजाननि हाजोखौ समायना नुहरो
गेददा गेददि बाथ्राफोरखौ
मोनहास'यै अख्रांआवबो गोजोना दं
अब्ला मिजिँ खालामनायाव माथो गोरोन्थि?
गोरान हाखौ जावनानै हासिङाव
खोल खोल दै मोनो
नोँनि बेफोरबादि रावखौ
गोसोआव दं आं दाबो
थेवबो नोँखि आंनि बिखाखौ
बोखावना नायदोँ?
रजे सोर्गो बारनानै सोर्गोखौ मोना
मोनो मुलुग गिदिँना मुलुगखौसो
खनले खनले बाथौ गिदिँ गिदिँ
सेर सेर नोँखौनो हास्थायो आं
दिनै बेसेबां फोलानो रजे?
हा जावनानै हा सिङाव
खोल खोल लैथो सिङाव
नोँखौ नागिरो आं- -
सोर्गो मोर्थो फाथाल
रजे गोरबोजोँनो नुयो आं
जिउजोँ जिउखौनो लोगो हमो
रजे सोदोब गाथे गाथे
खबाम एराय एराय
बेसेबां खारखोमानो नोँलाइ?
गोदान गाथोननि दै लानानै
बाथौ बोरायनि सिजौ गुदियाव
सान्ति सास्रि सास्रि
दुब्रि बिलाइजोँ नोँखौ दिहुनगोन आं
बैग्रि बिलाइनि मंगलाथायाव
नोँखि एब्रेना थानो हागोन?
एबा मोस्रोम उरिनि महर लानानै
होँगो दोँगो रायजोनि सायनासालियाव
नोँखि एरसोना थानो हागोन?
सा कामरुपनि दाउज्ला बेह्राया
ग'-गेरे-ग'- -
खेबसे गेसेरनाय सिगां सिगां
नोँखौ दिहुनगोन आं बावखुंग्रि हाजोनिफ्राइ- -

Wednesday, October 29, 2014
Topic(s) of this poem: art,love
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success