फुं सोरां बिलियाव Poem by Ronjoy Brahma

दुब्रिनि गुसु निरा सुहाब होयो
स्रो गुसु खोलो बारा बिलिर फैयो
लान्थि आंनि गोरबो सोलेरा थोर सुहाबो ।
गोरलै मोखांङै नुजानाय जोँमा साना
सिरि सिरि मिनि हरो-
दाउस्रि-दाउसेनफ्रा रंजादोँसै मालाय
गोख्रोँ गोगोम गेबेँ सोलेरजोँ
बिफां-लाइफांफ्रा मोदै हुगारदोँसै
रथ' रथ' रंजाखांनायजोँ;
मिथिँगानि फुं सोरां बिलियाव समायना
मिनिस्लु होदोँ सावगारिया गोरबोखौ।
सोरगिदिँ जेरैबो बायदि रैसुमै
गोदै रादाब, गोदै खौरां फोरमायनाय
हानजा लायै हानजा मोसायो,
खिसिर खिसिर मुसुर दावदोँ, .
गांखं बुब्राब, गोदोना फोलावदोँ
दाउसिनफ्रा बिरद' बाद' खालामदोँ ।
दान्दिसे गोमजोर मिनि हादे
नायहरो आं खोमा खोनासङै-
बिसोरो फोरमायदोँ गोदै रादाब
सानसेनि समखौ मोनफिन हाया,
बेयो खोन्दो मोनसेनो आनज्रायो ।
दाउसिनफ्रा हानजा जथुमदोँ
ज' ज'यै रंजानानै दान्दिसे
सानसेनि आदार नागिरनो
गोसो खुसि थियारि जादोँ ।
उन्दै उन्दै दाउसिनफ्रा
नागिरदोँ हनै बिफां दालाइ-बिलाइ
बिसोरो बिरद' बाद'
मोसा रंजानानै गोसो होदोँसै ।
सुहाबनायनिफ्राय आरोबाव सुहाबो
लान्थि आंनि गोरबो सोलेरा गोजांस्रिउ लाङो...
आखाय बोजबना बिखायाव
आवगाय फिन्नो लामायाव,
सोरां जोँमाया मिनिस्लु नायो
गुसु सोलेराव दुंब्रुद होयो ।