सोरांनायनि साइरेन Poem by Ronjoy Brahma

सोरां जाबाय
सोरां जाबाय
गामि गोमफबनाय
दाउज्ला बेरहाफ्रा बोलो होबाय
गगेरे ग' गगेरे ग'
होस्रिख्राव होस्रिख्राव।
न' उसुंनि जबा, सफारि दालाइयाव
फिट' फिट' उन्दै दाउसिनफ्रा
मानिबा गोदै रादाब फोरमायदोँसै,
खिसिर खिसिर दाउसिनफ्रा
माब्लाबानो जागायदोँसै मेथाइ।
सोरां जाबाय
सोरां जाबाय
बेसेबा गोजोनाव फेरेँगा दाउआ
थिटजौ थिटजौ फोजा हरदोँसै,
खुमब्रा बैसांनि खनायाव
गोबोर लादाया गोख्रै सिखारनो हांख्रायदोँसै।
सोरां जाबाय
सोरां जाबाय
सम गैलिया गोबाव
सम गैलिया आरोबाव
सिखार सिखार माबार
गलिनि हालुवा मोसौआ
खुगा सिब्लांना फोजा हरबाय,
मालाय हाल होलांनाय नुनानै
सैमा बोथायाबो भौ भौ सोँनो हमबाय ।
सोरां जाबाय
सोरां जाबाय
सिखारदो माबार सिखारदो
गुसु होनना
बादोँ रथ' होनना
एमाव उन्दुना थायोब्ला जालिया,
नै सिखार, नै सिखार
दाउखा जासुलाया उखैहाबना
बेदर हारा जम्फैदोँसै।
हरफा उखैहाबनाय
बारिनि अमा बुरैया
अ' ये अ' ये खेँखाय हरदोँसै ।
आरो मावजि बुन्दाया?
बेबो बाख्रि सिँआव उन्दुनायनिफ्राय
माब्लाबानो ज्रुम बाज्रुमदोँसै ।