नोँ आंनि गोदान Poem by Ronjoy Brahma

नुलायनाय जायाखै माब्लाबा
दिनैसो मानोबा सोरजिनि सानसुथिर समाव
मोखांजोँ मोखाङाव गोग्लैदोँ ।
नोँ आंनि गोदान
मोदानदोँ नोँनि महरा
बेरसारदोँ नोँनि खोमानि समायना
रिथि रिथा जोँसारनाय सना ।
हमदां हादोँ लाजिस्लु नोँनि
गोसोआ आंनि खाथियाव
जाबायदोँ मानोबा सासु मासु ।
अ' रजे मायनाव आंनि
बरायो आंनि गोरबो अखोरां
गेलेफै आंजोँ गोजोनै गेलेफै ।
नोँ आंनि गोदान रजे
मिथियो आंनि गोरबोआ
हमदां हादोँ लाजिस्लु नोँनि
बेयो बैसोनि सावगारि रजे
गन्थंखौ सिखोमा हाया सानसेबा
फोरमाय खागोन नोँदि आंनो
बेखौ आं नेदोँ रजे ।
नोँ आंनि गोदान रजे
गनायबाय गोरबोआ नोँखौ
फै रजे रजे गोरबोआव
दं आं सुस्रांना गोरबोआव
मोदोमफ्रु नोँनि सोलेरखौ
फै रजे जायगा दं साजायनाय ।