बोहैनायनि हेँथायै Poem by Ronjoy Brahma

फागुणआ फैगोन आरो थांफिनगोन
अब्लाबो फागुणआ गोमालांनायबादि नोङो
फैसालियाव दा आनज्रायलां मेगन मोदैजोँ
सोरनिबा मेगन आरो मोखांआव मोदै सारस्रिनानै।
लरेद मावरोङै गोथै नाया दैसायाव गोजावलाङो
गोथांआ दैसाखौ बारलांनानै नागिरो आदार,
अन्थाइ सायाव बाज्लना गेलेयो लोगोफोरजोँ समायनायै।
दैबाना फैयोब्लाबो नोँ दागोजावलां फेँफोनाबादि
जोमैया बबेहाय गोग्लैहैयो जोँ मिथिया,
जोमैनि फाफ्लियाव बाददिँग्लाय जाया बेखायनो।
आफाया गावनि फाफ्लियाव आंखौ थिखोना लाखालि
बेसेबा मिलौहाब खुसिमोन आं बावनो हाया!
जोमैबादि एबा फेँफोनाबादि एबा हाद्रिबादि
जोँनि गोसोफोरा बोहैबाय थायो अराय
जावलिया बानानि गुथाल बोहैनायनि हेँथायै
लागाम हमनानै आरो नोँ जुजिनांगोन गमामा।
नेहाथ रायखसनि अबथिरा दुगानायजोँ
गोसोखौ हमथानांगोन लासै लासै दावगानांगोन
घड़ि खाथानि आगाननि देँखो सुरजोँ।
मिथिगौ नोङो गाथ'वालनि दिङानि आथिँ;
जावलिया बोहैनायजोँ गोजावलांफायोब्ला अब्ला
नोङो जिउगैयै सह'- आलादिङा बन्थ'
नोँ गावखौ जिउगोनां एबा गोथां सानोब्ला
अब्ला जावलां दिङाखौ बोहैनायनि हेँथायै।