आंनि अरायसे Poem by Ronjoy Brahma

आंनि बान्दोसे होनाय दुखुआ
गसर गासे मोदै नङा
हाजोनि निजोरा गसरनाय दन्दरनि
गोगो सुग्लायहाबनाय
गोजोन निजोरासो ।
सोरांसि फुर्णिमा हरनि फेसानि
बाज्ल' हायै सिँहाबनाय दुखु
हायाखै आं रंजानो
गोजोन हरनि सिमांआव ।
रंजानाय-मिनिनाय मोनफेराखै
आं दिनैबो
सुबुंनि सोमोनांथाव
समायना महर सोरजियाव ।
अखा दामब्रानि ग्लाब ग्लाब फेँफोना
गांगा थफानि बाज्ल' बाज्ल' मोसानायाबो
दिनै आंखौ मिनिस्लुनाय दिन्थियाखै ।
कलमनि बायदि गाब
खालि बिदैआसो
आंखौ जेब्लाबो बोखथाबना लानो नाजादोँ ।
गाद्लुननानै गोग्लैनाय
गोजा खालिनि लैथोआव
दुखुआ आंनि रुगुं गैयै
राननो रोङै लैथो मोनसे ।
हागोन नोँसोर बर' माहारि?
आंनि रेबगननिफ्राय गनाय बिदैखौ..
नोँ सोलानो फारि फारि... ।(2014)