बबेयाव थांनो? Poem by Bahadur Basumatary

आय' गुफुर दावथु!
सोरांनि बन्जारखौ लानानै
खोमसि लामाखौ सौब्ला सौब्ला
बबेनिफ्राय फैखो?
आरो,
बबेयाव थांनो नोँ
खिन्थालां नोँ आंनो
दान्दिसे गोजोनै जिरायनानै
सुखुनि बाथ्रा नोँ आंजोँ रायज्लायलां,
मानि थाखाय हांखुर जादोँ नोँ?
नोँहा मा थांखि दं?
माखौ नागिरदोँ नोँ?
जिरायनाय गैयै सोलेरखौ लानानै
दाबो मेँनाय मोनाखै नोँ?
मेँनायखौ मेँनाय दुखुखौ दुखु होनालासे
बबे जायगासिम बिरलांबावगोन नोँलाय?
बेसेबां गोजानाव?
आय' गुफुर दावथु!
बुं नोँ,
मोजोमसे जिवखौ लानानै
नोँहा मा थांखि दं?
बबेसिम थांबावगोन?