सिनायमोनि आंनि सिमांनि रजे Poem by Bahadur Basumatary

सिनायमोनि आंनि सिमांनि रजे

आंनि रजे...........
नोँ जोबोर समायना!
नाथाय आं दाबो नोँखौ सिनायाखै रजे
आंनि सान-हर उन्दुनायनि सिमांफ्राव
आंदि नोँखौ साया मायाल' नुयो
बोदोरल' खालामो खंख्ला गोसोखौ।
नाथाय.......
नोँ आंनि सिमाङावल' फैमालाय मा जानो?
आं नोँखौ सिनायामालाय मा जानो?
नोँदि आंनि हरफ्रोमबो सिमाङाव लाबोयो
गोसोथोनायनि गोदै फिथिखा।
आं नोँखौ माबोरै बावनो हानो रजे?
नोँनि समायना-रमायना गोमो-गोथां
रं-बेरंनि हरनाय नोँनि आर'नाय।
आं बावनो हाया रजे
आं नागारनो हाया,
नोँनि समायना मनालिसानि महर
दाव मैनानि गारां
मिजि आखायनि आखल गोनां
ददेरे-फांदां अनसुलि
थार बर' सिख्ला।
नाथाय.........
आंदि नोँखौ दासिमबो सिनायाखै रजे,
बोसोरफ्रोमबो बैसागुयाव सानैजोँ रंजाबाय
बै सिमां रायजोयाव,
बैराथिफ्राबो हिन्जाव गोदान महरै
नोँखौ बरायबाय,
आंनि-नोँनि सनानि देराखौबो लुबाय।
थेवबो..........
आंदि नोँखौ दासिमबो सिनायाखै रजे
नोँनि गुबै मुं, थंफोरखौ मिथियाखै,
नोंनि समायना महराल'
आंनि उन्दुलांनाय गोरबो बिखाखौ फोजाफैयो।
बेफोर जेखि जादोला रजे,
नोँ जेसेबांखि आंनि मेगननि आन्दोयाव थायामानो
जेसेबांखि आंनि गोसैखौ सोगाबबाय थायामानो
थेवबो नोँथ आंनि सोरबा सासे सैनायखा
फैगौ मोखथां संसारनि नङाब्लाबो
आंनि हरफ्रोम सिमां रायजोनि रजे।
दिनै आं नोँखौ खावलायो रजे
नोँ नोँनि समायना महरखौ लानानै
बेबादिनो फैबायथा रजे
आंनि हरफ्रोमबो उन्दुनाय सिमाङाव
आंनि गांहाबनाय बिखाखौ आबुं खालामनो,
आंनि गोसोखौ जेब्लाबो गोजोनै लाखिनो
सानैजोँ रंजाबाय थानो।

Monday, July 28, 2014
Topic(s) of this poem: romantic
POET'S NOTES ABOUT THE POEM
DREAM
COMMENTS OF THE POEM
READ THIS POEM IN OTHER LANGUAGES
Bahadur Basumatary

Bahadur Basumatary

India(Assam) , Chirang(Tukrajhar)
Close
Error Success