दिनैनि गोदान मेथाइ Poem by Ronjoy Brahma

जों रोजाबलिया गोजाम मेथाइ
रोजा बोसोरनि,
दैबादि मिनिनायनि उल्था बिथिङै
बियो हायाव गोबाथाबनानै गाब्बाय
बिखौ हाजोंनो फबनाय जाबाय- बियो आबौमोन।
आथिखालाव बेफोरनि सावरायनांगौ जाया
समनि दाहाया आयखौ गोदोना सेरथेयो,
गोफाद हाथाइ दिन्थिनानै बुब्लिया बिरबोयो
बिजिजों सुब्रेयो आयनि मेगनाव।
लंथं बे मुगानि आयनि फिसाफोरा
नङाब्ला मानोथो जिनाहारि जायो?
खास्रि-बिस्रि दिनैनो बिदिन्थाजों,
अब्लासो निहिर सिरियो थिफुद्ला बिखानिफ्राइ।
आंनि दुब्लिनि गोरान लाइफांफोरा
बिरग्लांनो लुबैदों गां फुवारनानै
फागुणनि जावलिया बारनि खर' सायाव
आइया नायहरै नायहरै गाबदों जसोनानै!
जोंमा आं नोंखौ खुलुमो
नोंनो जिउ होयो आरो लाङो,
मारुं मोनहैयै लैथोमानि नाखौ
नोङो नायहरबाय थायो गोसोबादि।
इयुन बिदिन्थानि बोहैथि गुथालाव
उन्दुनाय गैया आयनि मोदैया,
लैथोमायाबो बेबादिनो उन्दुनो लुबैया-
थांनानै थानो लुबैयो आंगो गोबानानै।