सिख'नानै लागोन Poem by Ronjoy Brahma

गोसोनि गिनायखौ नागार
सान्दुंआ खामब्लाबो अखाया फिसिब्लाबो
लामायावनो फिरफिलाखौ गारनानै दाथां
थैनाया फैयोब्लाबो
बिखा बुयै बुयै फोरमायनाय जाबाय
गावनि उदां मोन्थाइ
रसा नाङै नाङै खुद्रिनाय जाबाय
बेसेबा सिमां आरो आखाय फुवारनानै
बिसोर गथायना होफैयाखै
गावनिनो मेगनजोँनो जोँ नुबाय
बेसेबा नेवसिनाय खोबखनाय जेरैबो जेबो
खर' आरो बिखायाव जुथानि दागो
लोगो उन्दुनानै दाथा बे हराव
खामबाय जेरैबो अरआ
फोजोबस्रांनायनि ब्लाव ब्लाव अर
अरजोँ जुजिनो अर सुखां माबार
सिख'नानै लागोन गावनिनो मोन्थाइ
बे मिथिँगानि जिब-जुनारा बुङो
हाजो आरो हिमालय हाजोआ रोजाबो
दैमा-दैसाया जिरि जिरि मेथाइ खनो
दाउखौऔनि देँखोआव बोदोर जानायबादि
उदांस्रिनि जांख्रिखांनायाव मोसाफै दौदिनि
मिलौदो सिमांखौ फसंनो
बयनिबो उदांस्रिखौ बरायना लाबोनो
बे जांख्रिथाइनि लामाजोँ
देरहानायनि फिरफिला बिरहोनानै
खामखौ दामदो माबार लोगो
गोदान सान ओँखारबोनायनि खबामजोँ