बोसोरफा थारला Poem by Ronjoy Brahma

नै लोगोफोर
आरो
गेदेमाफोर
खोनासं-
आंनि समा
बोसोरफा थारला
बोरै माबोरै रुंगलाङो..
आबादारि आफाया
लोगोसे आय
मोदै आरो गोलोमदै
जोँनि संसार,
गोरान हायाव होयो गोबोर
खष्ट मष्ट मावो आबाद ।
नै लोगोफोर
आरो
गेदेमाफोर
खोनासं-
आफाजोँ लोगोसे आं
मा मावो..
फैयो दैज्लां
सोरांफा माफा आफाया
हाल हुरनो..
.. बेनि उनाव आंखौ
आयआ फोजायो,
मोखां सुयै खदाल बान्ना
थांफानाङो आफाजोँ..
बानाय आंगायनाय आं
आलि खोयो
आरो
दानो ।
नै लोगोफोर
आरो
गेदेमाफोर
खोनासं-
हावरिया आय-आफानि
न'आ गिजि थुरिनि
अखा थरथिँनाय दैज्लांआव
थेवबो राहा जायो गोलांनो ।
नै लोगोफोर
आरो
गेदेमाफोर
खोनासं-
हावरिया आय-आफाया
बारिनि मैगंखौ फान्ना मोनो
गरसे गरनै रां,
आयआ आंनो लाबोयो
कलम आरो बिजाब ।
नै लोगोफोर
आरो
गेदेमाफोर
खोनासं-
फरायसा आंबो सासे
नांगौ आंनोबो सोलोंथाइ
बेजोँ आंनि गोदान संसार
बेजोँ आयआ गोदान मिजिँ
सास्रियो आयआ आंखौ
जाफुंथोँ जाफुंथोँ
मोदै आरो गोलोमदैनि गोगो
दैजोँ खर'आव ।
नै लोगोफोर
आरो
गेदेमाफोर
खोनासं-
बोथोरा आंखौ
बोरैजाय होयो बिदाय..
फैयो गोलोम बोथोर
दुं गरमा आंखौ
खालामो उसु खुथु,
थेवबो नाजायो
होखारनो आं
गय दनायखंनि गिसिब
सिबलानानै ।
फैयो गोजां बोथोर
गुसुआ आंजोँ आमथा आमथा
थोर थोर मोदोम मावनायजोँ
आं थांगासुरि जोमो,
सोरांनाय समाव
सिखारना खाहैयो
दुब्लियाव मोसौ
थोर थोर सिमा जोमग्लुबना ।
गैया सामब्रानि जेकेट
गैया उलनि सुथार
थोर थोर खौखाब मावनायजोँ
फोजोङो आं अर
गय दनायखंनि
गुसु सुहाबनाय आखायखौ
हाङो अर सालाइआव ।
सानफा सानफा
बोथोर बोथोर बाग्लायलाङो
बोसोरफा थारला
आंनि जिउआव
बेबादिनो थाङो ।


जानुवारि/2008