सिमांआव आं गोदो गोदो उन्दुलाङा Poem by Ronjoy Brahma

सिमांआव आं गोदो गोदो उन्दुलाङा

Rating: 5.0

अर्जुन्नि जिलिदा आंनि मेगनखौ होसोबोनो हागौ
थेवबो आं मेसेबाखै सानखौ हर खालामनानै,
दानखोमसि हरनि हाथर्खि फाग्लियाबो
आंनि गोसोखौ गोर गोर लानानै खारनो हागौ
नाथाय आं एब्रेना थायाखै दान्दिसेबो।
आरो फाग्लादिया आरोबाव बुरलुंबुथुरा?
बिसोर बाग्रायनो हागौ नारानाथा,
आं नाथाय गोर गोर खारनो नागाराखै
बिसोरनिनो बिखुंसाजोँ हरखौबो सान खालामनानै।
अखोरां फारसे मिचाइल हगारना
आं आरोबाव आखाय आजावना थायाखै,
सिरिफैगोन सिरिफैगोन हाथर्खि अखाफोर होन्नानै;
आं खारफादोँ मिचाइलखौ गोबानानैसो।
बैसागु सफैनोसै नंगौ खाथियाव फैथारबाय
सिमब्रे-सिमब्रा गिलुबालु बारहुंखाया-
आं जोमै सायाव दोनहैनो हायाखै,
बांग्रिं आरो दैज्लांनि दैबानामोनहा?
बिसोर आंनि आफाथालाखौ दिन्दां खालामनो हायाखै।
गाज्रि हांखो एबा सासननि बेँखना
आंखौ बामख्रबना लानो हायाखै दाबो,
खुवा खुवा आंखौ साग्लोबनो फैयो बियो
आरो आं थाबायलाङो बे फैनाय लामाजोँनो-
मिथिगौ बियो फैदोँ आरो आं थांदोँ।
थांबाय थागोन आं खाफाल दाखारा
हानि खालामग्रा बे हादोरखौ नागारनानै,
एबा थांबाय थागोन आं थगायनाय गैयै
सिगुण बिरदावग्रा अख्रांखौ नागारनानै
गुबुन गोदान हादोर एबा अखोरांआव

Saturday, July 19, 2014
Topic(s) of this poem: poem
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success