आं लाजिया Poem by Ronjoy Brahma

गोरबोनि बाथ्राखौ नोँनो
आं फोरमायनो
गोसोनि साननायखौ गेबेङै
फोरमायनो
आं लाजिया ।
आंनि राव
आंनि हारिमु
आंनि फाव
आंनि सिनायथि
नोँनो दिन्थिनो
नोँनो फोरमायनो
आं लाजिया ।
गैयाब्लाबो महर मुस्रि
गैयाब्लाबो हमथुमख' हायै
घोन घौलद
दं आंनाव बिखासे अन्नाय
दं आंनाव थफ्लासे गोरबो ।
सुबुंखौ अलखदाव मदद होनाय
सुबुंनि दुखुआव
थरथिँसे मोदै हुगारनाय
दं आंनाव दैमुनि दै जाना ।
गुबुना जंखायथोँ जाम्बा लल्ला होनना
थेवबो नागारा आं आबै आबौनि
आसार-खान्ति -हारिमु
गुबुना बर' जाम्बा
बेनो आंनि सिनायथि जाथोँ
गुबुना जेखि बुङा बुंथोँ-
बेनो आंनि सिनायथि,
बेनो आंनि माननि बान्था ।
आं लाजिया
जाया आंनि जोनोमनि
मोननाय
उसिफबनाय घोन
उसिफबनाय मान
सिनायथि
थेवबो आं उदां
आं उदां ।