आंनि लामायाव Poem by Ronjoy Brahma

जाय थाबायलाङो हाद्रिजोँ
खारफायो बिनि उनाव
बार मोदाय
जाय हाब्रुजोँ थाबायलाङो-
थांगौ बिनि उनाव थाजिम
अखा दामब्रा ।
जाय थाबायो गोसा सान्दुंआव
जेथो खामानिया बिनि दिनै ।
जाय नेयो बेलासि
फैगौ सायाखौ
दाथांसै जोबबाय मावनांगौ
खामानिया बिनि ।
आं नेयो माब्ला सोराङो
आं सानो र' थाथ'
मोनाबिलि,
दा देलायथ'
हाद्रिनि लामाया गिथाव
आं सानो-
हाब्रुनि लामाया थाजिम
बोलो गोनां
आं गोजोनो ।
गोसा सान्दुंआव
जेथो आंनि मुखुब
बेलासिया थखन थुनाय
आंनि सम,
सम आंनि जिरायनाय ।
आं जुरियो फुंआव
आं खारफायो
बुहुमा जेरै गिदिङो
समा सब्ला
मोनाबिलिया देलायब्ला
आं गोबागोन मिनिस्लु
मिनिनायजोँ...