खोलो खोलो बार नांदोँ Poem by Ronjoy Brahma

बे मोन्दांनाया गावनि असे सोलेरजोँ
गुदुं खर'खौ सुदेम बुब्लिजोँ सुजाबनानै,
आंखौ सुग्लाय गुथालाव बोजबना ला नोँ
जेन'बा नोङो आंखौ अनजालु सानो।
बार; नै सुदेम बार मोनाबिलिनि
आंजोँ गेले बिफांफोरखौ मेगनाव मोसाहोनानै
अह' मिथिगौ, मिथिगौ मिथिगौ
बुब्लिया दान्दिसेल' नेहाद दान्दिसेल'थार;
आंखौ नेनानै थाया दान्दिसेबो।
समखौ आथिँ सिङाव दोन्नो हानायमोनब्ला!
जेखिजाया आं सानो आंनि गोसो आरो जिउनि थाखाय
गावनि गोसोजोँ माबोरै लोगो जागोन।
आङो आमेरिकान जानायमोनब्ला
बायगर समखौ गावनि बिखुंआव बारगौमोन
आरो बर'फनि सिलखौ खेबसे फेजेनगौमोन।
खबामखौनो जिउ सान्नानै लाग्रा
अदेबानि सोदोबा खन्थाइगिरिनि जोबोद लोगो
खन्थाइगिरिया बुब्लिखौ फुथुफेरा
आंनि बुब्लिफोरा नाथाय आनज्रायलाङो।
आलायारनजोँ मिनिज्लायनाय बुब्लि,
स्निमोखां जायख्लंजोँ दैसासेराव नुज्लायनाय सम
बिलिफांआव अखाफोरजोँ नुज्लायनाय बिदिन्था
आसिनाव फुरसब जोमैजोँ नुज्लायनाय गाथोन।
खोलो खोलो मोनाबिलिनि बारा गोसोखांनो होदोँ
गामिनि फोथाराव जोँ बेसेबांदि रायज्लायोमोन-
गोसोथोनाय, गोसोथोखोमानाय गोसोनि बाथ्रा।
नै बार, बै समनि सुदेम बार
नोङो दाबो बेबादिनो दङ?
नोङो जोबोद खाफाल गोनां लोगो
अबंआ नोँनो बखालि जिउखौनो होदोँ
नोङो आंखौ बुरखायो फुथुयो फोजायो