जेब्ला आं जिरायना थायो Poem by Ronjoy Brahma

जेब्ला आं जिरायना थायो
हार्सिँङै लांगोनानि बिफां सिंङाव,
सिरि सिरि उन्दै दाउसिना मुसुरो
आंनि थेनथ'नायखौ फोजाङो
बियो लाबोयो उन्दै समखौ।
दिनै घड़ि गिदिँबाय बेसेबा गोबाव
आरोबाव थाद'आ,
आं गावनो बुजिबाय दिनै
बहा बिरलाङो दाउसिनफ्रा दालाइ-
लांदां उदां अख्रांआव।
आं मिनिस्लुयो नायहरै
अ' नंगौ मिथिगौ
फोरोँदों आंखौ सोरजिगिरि।
थैनायखौ हरदोँ परम ब्रह्मआ
जोबगोन सानसे सानस्रिया
बेनो ओंथिया फैसालि गोग्लैब्ला।
मेगनजोँ जोमै आंनि गोसोआ
दावहा अख्रांआव नायहरो हार्थखि,
एसे आं हायना जोमैखौ अनखाङो
नायबाय थायो समायना।
दावहाया सोरजोँ?
आं सानबाय थायो लामायाव,
जोबनाय फैगोन सानस्रिया
सोलायगोन जिउ आरो देरायाव।
मोन्दांस'वा गावनि गन्थंआ
बहा फैगोन उन्दुसोनाय देराया?
सानबायो आं अख्रांआव
जेब्ला आं जिरायना थायो।