यावे, स्वागत आहे! Poem by Rajeev Deshpande

दशदिशे कडूनी अनाहूत साद असतो
क्षितीजी अवनी आकाशाचा संवाद असतो

प्रपात झेलण्या आतुर पर्वताचा कडा असतो
मातृभूमी वरती पारिजातकाचा सडा असतो

ऋतुराज निसर्ग नटराज नटवित असतो
टवटवीत दाट झाडात चिवचिवाट असतो

बांग वेळ सकाळ कोंबडा पाळीत असतो
पात्यांना वारा गार कुरवाळीत असतो

स्वार वा-यावर मातीचा ओला गंध असतो
धुंद पहाटे जाई जुईचा सुगंध असतो

पूर्व पश्चिमेस रविराज खुलवित असतो
चांदराती शशिराज भान भुलवित असतो

शुभाशिष देण्या आतुर शंकर भोळा असतो
नवनीतावर शुभ्र श्रीरंगाचा डोळा असतो

उधळण्यास आनंद निसर्ग मेळा असतो
भूलोकी जीवन देवदुर्लभ सोहळा असतो!

(दै. मातृभूमी)