हरनिफ्राइनो अखाया हानो जुरिदों Poem by Ronjoy Brahma

हरनिफ्राइनो अखाया हानो जुरिजेनदोंमोन दासिम हाबाय थादों। बियो नागारलांआखै दाहालागैबो। सोरबा सोरबा मोजां मोनदों अखा हानायखौ। सोरबा सोरबा गाज्रिबो मोनसोगारदों अखा हानायखौ। आख'-फाख' माखौबा मावथावा महायबा थांथावा जादों। आं नाथाय मोननैनिबो गेजेराव दा नंगौबो आरो नङाबो। आंबादि गोबांआनो दं आं बेखौबो मोनदाङो-बुङो- बुंदों।

दासान्दि आं आंनि लोमजानायखौ लानानै जोबोद आख'-फाख'। आंनि गोसोआ जिरायनो हायाखै। थासारिया मोजां नङा अब्लाबो थासारिजों गोरोबनो बेनि गेजेरावनो गावनि आवथायाव मोनसे जिउ दखल खालामनो नाजानायखौ नागाराखै। मुलुगाव गाज्रि होननाय जेबो गैया। मोजांसिन होननायदि दं बे नंगौ अब्लाबो गासैखौबो आं मोजां मोननो नाजाबाय थादों। बेनि गेजेरावनो आंनि लोमजानाय…..! बाराखौ मा बुंनो? दासानदि आं फरायनो हायाखै। गोबां मोखां सौग्रावफैदों आंनि मोखांआव। गोबां देंखो गोबां गाब गेलेफैदों आंनि सेर सेर। बेबादि मुखुबनि गेजेरावनो  अखा आरो बांग्रिंआ जों बयखौबो लोमजाहोयो। आं बेबादिनो लोमजादों; अख्रांआ दंङब्लाबो अख्रांखौनो गैयैबादि मोनदों। आंनि ननि खोरखि-दरजा गासैबो दङाब्लाबो गैयैबादि मोनदों। फानजारि सिङावनो मेथाइ रोजाब रोजाब गावनि बायजोनि उदांस्रिखौनो जेन बावलांदों मासे बाथ' थिया। अख्रां फारसे आंबो बिरदावलांनो हायो गांखं बुब्राबनानै। गावनि गुस्थि, गावनि मेगन, गावनि गांखं आरो खर'नि समायनाखौ बयनोबो दिनथिनो हागौ। नाथाय…..! आंनि खोरखि-दरजाफोरा दा लहानि। इनजुराबो लहानि। उखुमा लांदां नंगौब्लाबो नाथाय अख्रांखौनो गैयैबादि मोनो। इनजुर आरो खोरखियावनो आंनि बांसिन नोजोर। नाथाय बेफोर लहानि। थेवब्लाबो लहाजोंबो आं जुजिया नङा जुजिबाय थादों। आंनि गोसो आरो सानस्रिफोरखौ आं दा इलेकट्रिकसिम गुस्लायहोनोबो नाजादों। लहा देफायग्रा मिस्ट्रिफोरनि दाजेमनि महरसिम सोलायहोनो नाजाबाय थादों।