ब्र. कु. ब्रह्म Poem by Prasenjit Mochahary

जिउनि मोगथां लामायाव मोनबोनाय
अनजिमा गैयै दुखु-दाहा आरो जखमजों
हाया हाया जुजिनो गोनां जानानै
समाय लादोंमोनब्लाबो
अमृतनि लैथोआव लोहाबनो
नों फैफिनमारबाय साहारायाव आवेसिच नागिरनो
आरो कौरब-पाण्डबनि गोदान कुरुक्षेत्र दावहायाव
बारसोममारबाय सासे गोदान अर्जुन जानानै।
मेगना मोले जाबोबाय, खोमा गोथेनो हमबाय
थेवबो 1974 मायथाइनि बदनाम होजानानै
थानांदोंमोनब्लाबो गुसेबथार
जोबथेसालिनि आख्रां सिङाव
अब्लाबो नों खोनायो मोनसे रादाब
जायख्लं नुजानाय गुवार गंसे अख्रांनि
जाय हाबिलासा नोंनि जिउजों उजिफानाय।
भुम खौराङाव बेनि रोखा, गुबै महरथि गैयाब्लाबो
नोंनि आख्रांखौ खालामनो गोसो दङ नोंहा
जेंना गैयै दरसे समायना इउट'पिया,
पन्च-इन्ड्रियनिख्रुय माबा मोनसे गोख्रों इन्ड्रिय दंबावो नोंहा
बिनिखायनो मोनदाङो नों खोमसिनि बिखायाव
हाजार मुगानि सोरांनि आंखाल।
साननायनि जेथोखौ खेवफ्रुसारना
सोरांनि नक्षत्र गोमोरनाय खोमसिनि बिखायाव
नों नागिरनाय, गोमानाय नोंनि महर मुस्रिया
रोजा बोसोरनि उनावबो बेरखांबाय
गोथां धोरनियाव नंगुबै महरथियै।
सानदुं गोसायाव रानज्रिंनाय
जोंनि आफादावदैखौ सुग्लायहोग्रा
अखा-बारहुंखायाव गोरलैयै थावरिग्रा
नों गोथां दुब्रि बिलाइ।
मोगथां आरो सिमांनि
सिमा हांखोआव गसंनानै
हारसिङै नों बरायहरो बै
गोदान बेसेन मोनदांथिजों
गोख्रों दावगासुला मुगा,
नाथाय थेबगां अजानि खासिनिया
दाबो जोंनि गोदोनायावनो
गोजाम लामाखौ जों दासिमबो
आबुङै एरखेनो हामारासै
सोमस्रिनि गुस्थिया लिपस्टिक्जों गोजासै
बैसागु बोथोराव, गितार बंकजोंलाय
बबाव हास्लाबबावनो खाम, सेरजा, सिफुं
दाबो थैयाखै नाथाय हालालि थान्दैया
मिरौ-जिरौयैब्लाबो थांनानै दङ
आबै खुजिनि दखना सुरि रोबैयाव।
गोजोनखोना गोजोनदिया
नोंदा प्रजिनि थैनो रोङै
‘जिब्रालटारनि अनथाइ'याव
गैया माथो फेरलेबसेबो गुमुर
नोंनि ‘दोंथाम खन्थाइनि जारिमिन' आव?
नोंनि आनजालु उथ्रिसारआबा
मा इसारानि गुमुर होनो नाजादों!
फोरमायलांबावदोल' जोंनो
‘मावनाय जखायै जों मोननो गोनां बान्थाया
दाजाबथायसो जाखोना, दानखथायसो जाखो?
गोथांनिसो जाखो ना, गोथैनिसो जाखो? '
जिउआ थायो दिन्दाङै
गोफोन दोंसे खुन्दुङाव
बेयोदि अराय गोजोर सैथो
सानजा अख्राङाव सान ओंखारनायबादि
बेनिनो गुरुं आगानखौ नुनानै
नोंनि गोसोआ मानो सोमखिखो?
जोंनि नबथिनि खरसे दैखराव
मुगानि उनाव मुगा
रायजो खुंबोनाय सम्राटखौ
मा मुङै गाबज्रिबावनांगौ जोंलाइ मा मुङै?
मोनखोना मोनदिया नों नागिरनाय
बयनिबो दुखु-खस्त बुजिगोरों
बेफोरखौ फोजोबनायनि थोजासे
गोहो गोनां आरो अनसुला
गोदा इसोरखौ (अबंखौ) ?
नोंनि हाबिलास अख्रांखौ? ?