बेबादिनो थांनानै थायो जोँ Poem by Ronjoy Brahma

थे बुहुमा जेब्ला गसंथेयो सानखौ एबा गावनि रिमोनद्ला दुलुर बिखायाव आंखौ गोबाख्रबो।
होनबानो गिलुबालु खेबसे जायो आंनि गासैबो मोखांआव।
हालाय-हाफाय खाराव-माराव,
बेसेबा खाराव-माराव अनजालि आं नोँखौ गोसो खाङो।
''माबोरै दंङ नोङो, माबोरै दं नोङो'' होन्नानै।
बेबादिनो आं उसु-खुथु जायो,
बेसेबा उसु-खुथु जायो आं।
मेगन मोदै जायै जायै दुलुर बुहुमनि रिमोनद्ला बिखायाव गोदो गोदो उन्दुलाङो।
सिमां नङा मोकथां नङा,
बेसेबा गोदो गोदो आरो गोदो गोदो।
नाथाय सानखौ गोबाव गसंथेनो हाया बियो,
होनबा आंबो एमब्रा एमब्रा बारगयो मेगन हुब्लिर हुब्लिर बिनि रिमोनद्ला बिखानिफ्राय।
रजे बेबादिनो थांनानै थायो नोँ,
बेबादिनो थांनानै थायो आं।