स्लगान/खामनाय साल सिरि Poem by Ronjoy Brahma

बे अरननि फांसे जिउ जिरायसालि
साल सिरिया खामबाय
साल सिरिया खामबाय होन्नानै
दाउसिन-दाउला जिब-जुनारा सफैबाय
-
बयबो सोमोनांदोँ आय'!
साल उखुन्दैनि गोथाव मोदोमनायजोँ
हां बोलाय हगारलाय
गोजानाव थानानै नायहरदोँ
-
बिनि मोदोमनाया दिनै बेसेबा गोथाव
नाथाय बियो अरायनि नंलिया
दाउसिन-जुनाराबो बुजिदोँ
सोरबा अन्थाइ बिखा फलाना सावबाय
-
दाउसिना मोदै फसरना सानदोँ-
''बे बिफांखौ लानानै जोँ बेसेबा आसामोन
बेयावनो जोँ बासा बोयोमोन
बिफांनि दालाइयाव मेथाइ खनोमोन''
-
जिउ जिबिया गोसोआव नांदोँ-
''बे बिफांनि सायायावनो
जोँ गोदो गोदो उन्दुलाङोमोन
सानसुनि गोसा सान्दुंखौ
सोनाब फारसे नारहरनो हायोमोन''
-
खामनाय साल सिरिखौ
दिनै बे अरननि गासैबो
थरथिँसे मोदैजोँ लुखोमोरनो हाया
खामदोँ बेसेबा गोथाव मोदोमफ्रु
-
थेवबो बे अरननि बयबो खौसे जायोब्ला
बयनिबो गारां मोनसे आर'जजोँ
गोमोरगोन फोजोबस्रांनाय अर
रैखा मोनगोन अखाजोँ खामनाय साल सिरि