गां गोनां आंनि अनजालिया
सतबांसा जाबसिनदोँ आंखौ
ओजोँ खबाम दोरोद्नाय आश्रमनि लांगोनायाव
गोदानै दिक्षा मोन्नाय आं
-
साननि एमब्रानाय-
अखाफोर मन'नायनि सायख्लुमाव
जायख्लंनि गाबखौ नायदाव नायदाव-
माबा मिजिँ सिमाङाव नुफेरथारै
-
बालन्दा हाथर्खि-
आदुंगारि खाबोथिउनि इसानसालि
ओजोँ गाबनि गाब मेथाइनि मेथाइ
थैनि रोदा रोदा दैसा निजोरा
-
थरथिँसे मोदैनि गुथाल
फागुणनि दैस्लुंआव
बेवहायनो सिमलि बेगरनि गाजा
आय फै आफा फै होन्नायबादि
गोबा फैदोँ बायदि बायदि गाब
-
थांनाय फैनायनि नैबे लामा
बबेनिफ्रायबा रिउ रिउ-
थांफिननो सानो लाजिनायजोँ
मेगन मोदैजोँ खुदै लानानै
-
फाग्लिथार सयथिबो नोङो
नोँखौ थगायथारदोँसो आं
बेबादि होन्नानै बुंनो सानोब्लाबो
बिखायाव दुब सौजानो गियो आं
खै खै मिनिना जिग्रोद दुफांजोँ
-
उदां बोथोरनि जावलिया बारा
जारमान जग्रबसेखौ सोमावनानै
आंनि सेरजोँ बारलांथोँ
आरो फागुणि- -
This poem has not been translated into any other language yet.
I would like to translate this poem