गोजोननि सोंथि Poem by Bidindra Basumatary

गोजोननि सोंथि

नैबे बिखायाव गोजोमै गोजोमै
आं दिनै आंगायनाय मोनबाय
बेनिनो गोजाम मुगानि गुबुंले आरो हाद्रि-बालानि दै-बारखौ।
आंनिनो आखाइयाव फिसा बेसाद माब्लाबानो
रुजुनख'हायै बिबान आंनि खाफालाव,
आंनि गोसोनि सानस्रियाव गसंफैबाय
बुब्लिनि मोनसे गोदान सोंथि
जायखौ दिनै सुबुं माहारिया
गिलुं गोसोआव लाखुमादों-फिननाय,
गोथोङै बुंफोरनो हायाखै-जुगुमलायनायाव।
अब्लाबो, गोदान मिजिंनि हाबिलायाव
बुहुमनि जब्रायाव खेंखायनायखौ
माबोरै लाखुमानो आं,
बबे बिखाजों फोलानो? ?
मिजिंनिनो फैसालि रुबैयाव
जाखांफैयो गाब गैयि गोदान महरजों,
आं हमनो होसोलाङो
मेगननि नोजोरा बेथिंल' खारलाङो;
नाथाय हाया हमथानो, माबा गैयियाव
मिथिस'नो हाया बेनि रादाब बिलायनाय,
जायखारलाङो आंनि नोजोर बिखानिफ्राय
गोजानाव गोजान आंनि साखाथिनिफ्राय।
जायनि सोंथिया बेनोमोन-
मानो आंजों फैदिया नोंसोर
हमथानो आखाइ थाइनैजों?
जायनि थाखाय आं आरो नोंसोर
दुखु मोनखुमादों सिरि सिरि।
जायखौ ज'यै होसोलाङोब्ला मोनगोन गोख्रैयै,
नाथाय जेरै आं हारसिंयै होसोबायदों
बेबायदि मेंग्लिहाबनाय होसोबाय थायोब्लाबो
मोनगोननि मिजिंआ नुहुरस'यै अख्रां सायावसो,
जाय मुवायानो जादों जोंनिनो गंसे न'सा,
बे न'सायानो जोंनि गोजोननि देरा।
बेखायनो सोंलुवा सिखारदों जावले जावले
नोंसोर माखौ गिना गंस्रिदों?
नोंसोर मानो आनज्रायना हाबसोखुमादों?
नोंसोर मानो बुंफ्लादोंल' आंनोबो एबा जोंनोबो नांगौ?
बे देराखौनो नांथारगौ होनना नेदोंब्ला
मानोथो आवगाय बोदिया बिखा फोरदानना?
मानोथो आखाय हमलायनो गोसो दुंदिया?
बेखायनो सोंलु सोंबावो
नोंसोर गावजों गाव सैलायि नङाथ'?
नोंसोर मानिबा गोब्राब नारसिननायजों
सोरनिबा बायलाय फानलाय खालामजायाखैथ'?

Tuesday, December 1, 2015
Topic(s) of this poem: peace,question,want
COMMENTS OF THE POEM
READ THIS POEM IN OTHER LANGUAGES
Bidindra Basumatary

Bidindra Basumatary

Bhatopara [13/04/1997] Panbari, Bijni
Close
Error Success